ഉല്ലാസ് ചെമ്പൻ സംവിധാനം ചെയ്‌ത്‌ ചെമ്പൻ വിനോദ് ജോസ് നിർമ്മിക്കുന്ന ഏറ്റവും പുതിയ ചിത്രമാണ് ‘അഞ്ചക്കള്ളക്കോക്കാൻ’. ചെമ്പൻ വിനോദ്, ലുക്ക്മാൻ എന്നിവർ പ്രധാന വേഷത്തിലെത്തുന്ന ചിത്രം മാർച്ച്‌ 15 ന് തിയറ്ററുകളിൽ എത്തും. അങ്കമാലി ഡയറീസ്, സ്വാതന്ത്ര്യം അർദ്ധരാത്രിയിൽ, ജെല്ലിക്കെട്ട്, ചുരുളി, സുലൈഖ മൻസിൽ തുടങ്ങി നിരവധി ചിത്രങ്ങൾ പ്രേക്ഷകരിലേക്ക് എത്തിച്ച ചെമ്പോസ്കി മോഷൻ പിക്ചേഴ്സാണ് ഈ ചിത്രവും പ്രേക്ഷകർക്ക് മുന്നിൽ എത്തിക്കുന്നത്. 1980 കളുടെ അവസാനം പശ്ചാത്തലമാക്കി കേരള കർണാടക അതിർത്തിയിലെ ഒരു ഗ്രാമത്തിൽ നടക്കുന്ന കഥയാണ് അഞ്ചക്കള്ളകോക്കാൻ. പേര് പോലെ തന്നെ ഏറെ വ്യത്യസ്തമായ ചിത്രത്തിന്റെ പോസ്റ്റർ നേരത്തെ പ്രേക്ഷകരിൽ ശ്രദ്ധ നേടിയിരുന്നു. മണികണ്ഠൻ ആചാരി, മെറിൻ ഫിലിപ്പ്, മേഘാ തോമസ്, ശ്രീജിത്ത്‌ രവി, സെന്തിൽ കൃഷ്ണ എന്നിവരാണ് മറ്റു പ്രധാന വേഷങ്ങളിൽ എത്തുന്നത്. സംവിധായകൻ ഉല്ലാസ് ചെമ്പനും വികിൽ വേണുവും ചേർന്ന് തിരക്കഥ ഒരുക്കിയ ചിത്രത്തിന്റെ ചായാഗ്രഹണം നിർവഹിച്ചത് ആർമോ ആണ് . സംഗീത സംവിധാനം മണികണ്ഠൻ അയ്യപ്പയും എഡിറ്റിംഗ് രോഹിത് വി എസ് വാര്യത്തതുമാണ് ചെയ്തിരിക്കുന്നത്.
വേഷവിധാനങ്ങൾ പലവിധം: ‘അഞ്ചക്കള്ളക്കോക്കാൻ’ തിയേറ്ററുകളിലേക്ക്
