വിനായക് ദാമോദര്‍ സവര്‍ക്കറുടെ ജീവിതത്തെ പ്രധാന പ്രമേയമാക്കി രൺദീപ് ഹൂഡ സംവിധാനം ചെയ്ത ‘സ്വതന്ത്ര്യ വീർ സവർക്കർ’ എന്ന ചിത്രത്തിന്റെ ട്രെയ്‌ലർ പുറത്തിറങ്ങി. രൺദീപ ഹൂഡയാണ് കേന്ദ്ര കഥാപാത്രത്തെ അവതരിപ്പിക്കുന്നത്. ഈ വേഷത്തിൽ ബിഗ് സ്ക്രീനിൽ എത്താൻ ശാരീരികമായ വലിയ തയാറെടുപ്പുകളാണ് രൺദീപ് നടത്തിയത്. 18 കിലോയിലധികം ശരീരഭാരമാണ് അദ്ദേഹം കഥാപാത്രത്തിനുവേണ്ടി കുറച്ചത്. സവർക്കറുടെ 138-ാം ജന്മവാർഷിക ദിനത്തിലായിരുന്നു സിനിമയുടെ പ്രഖ്യാപനം നടന്നത്. ഇന്ത്യൻ സ്വാതന്ത്ര്യ സമരങ്ങളുടെ മറ്റൊരു തലമാണ് ചിത്രത്തിലൂടെ അണിയറപ്രവർത്തകർ പറയാൻ ശ്രമിക്കുന്നത്. ലണ്ടൻ, മഹാരാഷ്ട്ര, ആൻഡമാൻ എന്നിവിടങ്ങളിലായി ചിത്രീകരിച്ച സിനിമയുടെ നിർമ്മാണ പ്രവർത്തനങ്ങൾ ആരംഭിച്ചത് 2021 ജൂണിലാണ്. ആനന്ദ് പണ്ഡിറ്റ്, സന്ദീപ് സിങ്, സാം ഖാൻ എന്നിവർ ചേർന്നാണ് ചിത്രം നിർമിക്കുന്നത്. മഹേഷ് മഞ്ജരേക്കറായിരുന്നു ചിത്രത്തിൻ്റെ ആദ്യത്തെ സംവിധായകൻ. എന്നാൽ, ചരിത്രത്തിൽ ഇല്ലാത്ത കാര്യങ്ങൾ സിനിമയിൽ ഉൾപ്പെടുത്താൻ രൺദീപ ഹൂഡ ആവശ്യപ്പെട്ടു എന്ന വെളിപ്പെടുത്തലിനെ തുടർന്ന് 2022 ൽ മഹേഷ് മഞ്ജരേക്കർ ചിത്രത്തിൽ നിന്ന് പിൻമാറി. അങ്കിത ലോഖണ്ടെയാണ് ചിത്രത്തിലെ നായിക. ആർ ഭക്തി ക്ലെൻ, മാർക്ക് ബെന്നിങ്ടൺ, അമിത് സിയാൽ എന്നിവരാണ് മറ്റു പ്രധാനകഥാപാത്രങ്ങളെ അവതരിപ്പിക്കുന്നത്. മാർച്ച് 22 നാണ് ചിത്രം റിലീസ് ചെയ്യുന്നത്.
സവർക്കറുടെ ജീവിതം രണ്‍ദീപ് ഹൂഡയുടെ ക്യാൻവാസിൽ; ‘സ്വതന്ത്ര്യ വീര്‍ സവര്‍ക്കര്‍’ ചിത്രത്തിന്റെ ട്രെയ്‌ലര്‍ പുറത്തിറങ്ങി
